Celfyddydau Rhyngwladol Cymru yw asiantaeth ryngwladol Cyngor Celfyddydau Cymru.
Rydym yn darparu cyngor a chefnogaeth i artistiaid a sefydliadau celfyddydol o Gymru sy'n gweithio'n rhyngwladol. Rydym yn bwynt cyswllt i artistiaid, sefydliadau ac asiantaethau rhyngwladol sy'n gweithio yng Nghymru neu sy'n cysylltu â hi.
Ein pwrpas yw meithrin potensial artistig, creadigol a diwylliannol rhyngwladol Cymru mewn ffordd sy’n deg i bobl ac i'r blaned.
Rydym yn cymryd rhan mewn nifer o rwydweithiau allweddol yn Ewrop sy'n sicrhau ein bod yn parhau i adeiladu a chryfhau ein perthynas ryngwladol. Rydym yn aelodau o IETM, On the Move, Culture Action Europe a Res Artis.
Os ydych yn artist sy’n gweithio yng Nghymru gallwn ddarparu cyngor, arweiniad a gwybodaeth trwy ein digwyddiadau, ein platfformau yn y cyfryngau cymdeithasol a’n gwefan. Gallwn eich cefnogi trwy grantiau’r Gronfa Cyfleoedd Rhyngwladol neu drwy ymyriadau strategol eraill, megis bwrsariaethau ar gyfer ymgyrchoedd penodol fel Cronfa Ddiwylliannol Cymru a Japan.
Os ydych yn artist rhyngwladol sy’n edrych i wneud cysylltiadau yng Nghymru, neu’n hyrwyddwr, asiant neu sefydliad rhyngwladol sydd am wahodd artist neu sefydliad o Gymru i gymryd rhan yn eich digwyddiad neu brosiect, gallwn helpu i’ch rhoi ar y trywydd iawn.
Rydym yn bartner strategol i Lywodraeth Cymru a British Council ac yn gweithio mewn partneriaeth ag asiantaethau diwylliannol a llywodraethol eraill yng Nghymru a’r DU.
Cyngor Celfyddydau Cymru – Fframwaith Strategaeth Ryngwladol 2024-2034
Mae’r strategaeth ryngwladol hon yn fframwaith deng mlynedd ar gyfer buddsoddiadau rhyngwladol Cyngor Celfyddydau Cymru a arweinir gan ein hasiantaeth Celfyddydau Rhyngwladol Cymru (CRhC).
Mae’n pennu’r blaenoriaethau strategol ar gyfer ein gwaith Rhyngwladol, wedi’u nodi ochr yn ochr â fframwaith gwerthuso llesiant diwylliannol newydd sy’n gysylltiedig â chwe amcan corfforaethol Cyngor Celfyddydau Cymru.
Nid dogfen statig fydd hon. Bydd yn esblygu dros y 10 mlynedd nesaf wrth i'r byd a’n gwaith datblygu a newid.
Rydym yn hapus i gyflwyno’r strategaeth hon mewn digwyddiadau amrywiol drwy gydol 2025 ac i chi ein helpu i brofi’r fframwaith gwerthuso. Os hoffech i ni fynychu un o’ch digwyddiadau i drafod y strategaeth, cysylltwch â ni drwy e-bost info@wai.org.uk.