Dyma gyfres o englynion gan y bardd Mererid Hopwood i ddymuno'n dda i'n harwyr glew yn eu gem yng Nghwpan Rygbi'r Byd y dynion yn erbyn Georgia yn Nantes, ar ddydd Sadwrn, 7 Hydref 2023.
Awn i Nantes, i dre’r Nentydd – tua Breizh,
tua bro llawenydd,
yn griw dewr i gario’r dydd:
y Gallois gyda’n gilydd.
Ah! Mon Dieu! C’est le mondial;– et les Rouges
sont la rêve ddihafal,
les acrobates diatal:
sont garçons du Pays de Galles.
Allez! Allez! Mae Calon Lân – ar waith,
mae les Rouges ymhobman!
Ni piau’r coupe a’r Cwpan,
le rugby, Gymru, yw’r gân!
Ein Carfan, awn amdani’n ... ffor’ ma dweud? ...
‘Formidable!’ a sgori;
ac ar ras mynnwn groesi
y llinell wen yn un lli.
Fel pob gwlad wâr dod i chwarae – wnawn ni
Hyd y Nos, heb arfau,
a’n cais siŵr heb un casáu:
tegwch yw’n holl dactegau.
A thân ein cân yn ein cynnal – o bàs
i bàs drwy bob cymal;
un enw fydd ar ana’l
y byd i gyd: Pays de Galles!
Dewi, bydd melodïau – y cewri’n
ein cario, a dreigiau
coch Hen Wlad fy Nhadau
fel un côr yn concro’r cae.
Mererid Hopwood.
Gofynwyd i Mererid Hopwood ysgrifennu'r gerdd hon gan Celfyddydau Rhyngwladol Cymru ar gyfer dathliadau Blwyddyn Cymru yn Ffrainc 2023. Darllenwyd y gerdd am y tro cyntaf gan y Prif Weinidog, Mark Drakeford mewn digwyddiad gyda'r Foheddig Menna Rawlings, llysghennad benywaidd cynfaf Prydain i Ffrainc.