Cynllun peilot i gefnogi sefydliadau celfyddydol Cymru trwy’r ‘Bydi Cymraeg’

Mae ‘Bydi Cymraeg’ yn gynllun gweithredu dwys newydd i gefnogi sefydliadau celfyddydol Cymru i osod y Gymraeg yng nghanol eu cynlluniau a gweithredoedd creadigol. Mae’n gynllun sydd wedi ei ddylunio gan  Ysgogydd y Gymraeg, Cyngor Celfyddydau Cymru a’r rhwydwaith gelfyddydol Creu Cymru a bydd ar gael i sefydliadau sy’n aelodau o Creu Cymru. 

Bydd Bydi Cymraeg, sef unigolion gyda phrofiad helaeth o ddatblygu defnydd  iaith trwy ddulliau creadigol, yn gweithio gyda’r sefydliadau llwyddiannus dros gyfnod o 6 mis ac yn rhoi gwerth 12 diwrnod o’u hamser yn rhad ac am ddim fel rhan o’r cynllun peilot. Mae croeso i sefydliad ychwanegu at y gyllideb sylfaenol sy’n rhan o’r pecyn er mwyn ymestyn neu gynyddu’r amser.

Bydd 2 sefydliad yn cael eu dewis yn y flwyddyn gyntaf. Y cyfan sydd rhaid gwneud yw datgan diddordeb i fod yn rhan o’r cynllun. 

Rhaid ateb y cwestiynau isod i geisio:

• Pam eich bod am gymryd y cynnig?

• Beth fydd budd y cynnig i’ch sefydliad?

• Sut y byddwch chi’n cefnogi’r cynllun ac yn profi ymrwymiad iddo?

Mae’r cynllun hwn yn ychwanegol i’r cynigion dysgu Cymraeg eraill sydd yn cael eu cynnig i sector y Celfyddydau trwy Cyngor Celfyddydau Cymru a’n partneriaid:

Dysgu a defnyddio'r Gymraeg

Cynnig Cymraeg (marc safon gan Comisiynydd y Gymraeg)

Byddai’n fuddiol os byddai’ch sefydliad eisioes yn cymryd mantais o’r cynlluniau yma.